Փայլանը վրդովված է` Էրդողանը ողբերգական վթարի պատճառով չի հետաձգում երդման արարողությունը

Թուրքիայում քրդամետ Ժողովուրդների դեմոկրատական կուսակցության հայ պատգամավոր Կարո Փայլանը թվիթերյան էջում անդրադարձել է Թուրքիայում տեղի ունեցած` գնացքի խոշոր վթարին, որի հետևանքով 24 ուղևոր է զոհվել, իսկ 318-ը՝ վիրավորվել։

Փայլանը վրդովվել է այն բանից,  որ  տեղի ունեցածի պատճառով Թուրքիայի նախագահ Ռեջեփ Թայիփ Էրդողանը չի պատրաստվում չեղարկել հուլիսի 9-ին կայանալիք` իր երդման արարողությունը։

«Չորլուում նրանց կողմից քաղաքացիներ են կոտորվել, իսկ մինչև հիմա նրանք շքեղ արարողությունից են խոսում։ Անամոթնե'ր, սրբություն չունեցողնե'ր»,- գրել է պատգամավորը:

Հետագայում Փայլանը ևս մեկ գրառում է արել այդ մասին` ուշադրության արժանացնելով այն փաստը, որ  Թուրքիայի իշխանությունները մեկ ամիս առաջ չեղարկել էին Չորլուում տեղի ունենալիք շինարարական աշխատանքները, որոնք պիտի ուղղված լինեին սողանքների կանխարգելմանը: