Ցեղասպանություն ասելը հանցանք չէ. Ստամբուլի դատախազությունն արդարացրել է ապրիլի 24-ին ձերբակալվածներին

Այս տարվա ապրիլի 24-ին թուրքական ոստիկանությունը չէր թույլատրել Ցեղասպանությանը նվիրված միջոցառումների անցկացումը` ձերբակալելով դրա մասնակիցներից մի քանիսին:

Ըստ «Ակօս»-ի` Հայոց ցեղասպանության վերաբերյալ պաստառներ պարզած երեք անձ բերման էր ենթարկվել:

Ստամբուլի գլխավոր դատախազությունն այդ գործով ուշագրավ հայտարարություն է արել` արդարացնելով «մեղավորներին»: Դատախազությունը նշել է, որ «ցեղասպանություն» ասելը հանցանք չէ` հավելելով, որ այդ արտահայտությունը պատմաբանների ուսումնասիրելու հարցն է:  

Դատախազության համոզմամբ` այդ եզրույթը, որքան էլ անհանգստություն պատճառող և անընդունելի լինի, այնուամենայնիվ, չի պարունակում թուրք ժողովրդին վիրավորող, նվաստացնող որևէ տարր: Հետևաբար, այս ամենը հիմք ընդունելով, կարող են ազատ արձակվել:

Ապրիլքսանչորսյան միջոցառումներ նախաձեռնող խումբն իր հերթին հայտարարել է, որ այսուհետ դատախազության այդ որոշումն իրենց մոտ են պահելու և այդ հարցով որևէ խոչընդոտի հանդիպելու դեպքում դիմելու են համապատասխան մարմիններին: