Չավուշօղլուն Մանբիջի մասին հայտարարություն է արել, ԱՄՆ պետքարտուղարությունը` հերքել

Թուրքիայի ԱԳ նախարար Մևլութ Չավուշօղլուն  կմեկնի ԱՄՆ` հանդիպելու ամերիկացի պաշտոնյաների հետ: Ըստ Demokrathaber-ի` նա  կքննարկի Սիրիայի քրդական ուժերի վերահսկողության տակ գտնվող Մանբիջ քաղաքի հարցը:

«Սիրիայի քրդական ուժերը դուրս են գալու Մանբիջից, իսկ Թուրքիան հետևելու է այդ գործընթացին։ Միջոցներ են ձեռնարկվելու, որպեսզի ապահովվի գործընթացի անվտանգություն»,- ասել է Չավուշօղկուն:

Նրա խոսքով` այդ հարցում համաձայնության գալու դեպքում նման գործընթացներ կարող են տեղի ունենալ Սիրիայի հյուսիսային այլ շրջաններում ևս։ 

«Կարծում եմ, որ Վաշինգտոնը ցանկանում է կտրել Սիրիայի քրդական ուժերի և Քուրդիստանի բանվորական կուսակցության միջև գոյություն ունեցող կապը»,- նշել է  Չավուշօղլուն։

ԱՄՆ պետքարտուղարության խոսնակ Հիթեր Նոյերթն իր հերթին ասել է, որ թուրք պաշտոնյաների հետ Մանբիջի վերաբերյալ դեռ որևէ պայմանավորվածություն չկա։