Ռուսաստանի հետ մեր հարաբերությունները հիմա ավելի վատն են, քան երբևէ. Թրամփ

ԱՄՆ նախագահ Դոնալդ Թրամփն իր թվիթերյան էջում ևս մեկ կոչ է հղել Ռուսաստանին:

«Ռուսաստանի հետ մեր հարաբերությունները հիմա ավելի վատն են, քան երբևէ եղել են, և դա  ներառում է սառը պատերազմը: Դրա համար որևէ հիմք չկա: Ռուսաստանին օգնություն է հարկավոր տնտեսությունում, ինչը հեշտ կլիներ անել, և մենք կարիք ունենք, որ բոլոր ազգերը միասին գործեն: Դադարեցրեք սպառազինությունների մրցավազքը»,- գրել է նա:

Նշենք, որ քիչ առաջ թվիթերյան իր էջում Թրամփը հայտարարել էր. «Ռուսաստանը խոստանում է խոցել Սիրիայում արձակված ցանկացած հրթիռ: Պատրաստվի'ր, Ռուսաստա'ն, քանի որ դրանք կլինեն՝ գեղեցիկ, նոր և «խելացի»: Դուք չպետք է համագործակցեք մի կենդանու հետ, ով ամեն օր քիմիական գազով սպանում է իր ժողովրդին և դրանից հաճույք ստանում»: