Գնդապետ ներկայացած կինը քաղաքացուց 1 մլն դրամ է հափշտակել` խոստանալով փոխել որդու զորամասը

ՀՀ ՊՆ ռազմական ոստիկանության աշխատակիցները, իրացնելով ստացված օպերատիվ տվյալները, պարզել են, որ 2015թ. հունվար ամսին Գեղարքունիքի մարզի բնակչուհի` ոմն Նելլին, ներկայանալով որպես ՀՀ ՊՆ զինծառայող` կոչումով գնդապետ, և վստահություն ձեռք բերելու համար իր ամուսնուն՝ Գ.Շ-ին, ներկայացնելով որպես գեներալ, ՀՀ ՊՆ N զորամասի սպա Ս. Թ.-ին իր բնակավայրին մոտ որևէ զորամաս տեղափոխելու պատրվակով վերջինիս հայր Վ. Թ.-ից կանխիկ ստացել է խոշոր չափի՝ 1.000.000 ՀՀ դրամ գումար և խաբեությամբ հափշտակել այն: Վ. Թ.-ն այդ գումարը տալու համար «Արտշինինվեստ» բանկում գրավադրել է իր տունը: 

Դեպքի վերաբերյալ քաղաքացիներ Վ. Թ.-ն և Ս. Թ.-ն ՀՀ ՊՆ ռազմական ոստիկանությունում տվել են գրավոր հաղորդում, որի հիման վրա նախապատրաստվում են նյութեր: 

Ձեռնարկված միջոցառումներով պարզվել է, որ ոմն Նելլին Գեղարքունիքի մարզի բնակիչ, 1959թ. ծնված Քնարիկ Վոլոդյայի Սուքիասյանն է: Նա ՀՀ ՊՆ զինծառայող չէ:

Ռազմական ոստիկանությունը ևս մեկ անգամ հորդորում է քաղաքացիներին` զերծ մնալ հակաօրինական գործողություններից: