Վրաստանի վարչապետը կոչ է արել Ռուսաստանին` համատեղ քայլեր անել հարաբերությունների կարգավորման ուղղությամբ

Վրաստանի վարչապետ Գեորգի Կվիրիկաշվիլին կոչ է արել Ռուսաստանին` համատեղ քայլեր անել երկկողմ հարաբերությունները կարգավորելու ուղղությամբ. հայտնում է РИА Новости-ն:

«Այս տարվա օգոստոսին լրանում է 2008-ի պատերազմի 10-րդ տարելիցը: Այդ ողբերգական երևույթը խոր հետք է թողել վրաց ժողովրդի կյանքում և վրաց-ռուսական հարաբերություններում: Խզվել են դիվանագիտական կապերը: Ռուսաստանի կողմից Աբխազիայի և Ցխինվալի շրջանի` Հարավային Օսիայի ճանաչումը փակուղի է մտցրել միջպետական հարաբերությունների կարգավորման հեռանկարը»,- նշել է նա:

Կվիրիկաշվիլիի խոսքով` ներկայումս պետք է ընտրություն արվի` դիմավորել այդ տարելիցը փոխադարձ մեղադրանքներով և կտրուկ հայտարարություններով, թե` «խելամիտ», թեկուզ աննշան քայլեր անել հարաբերություններն այդ կախարդված շրջանից դուրս բերելու համար: