Մակրոնը լսել է Փայլանի մտահոգությունը, ապա՝ կոչ ուղղել Թուրքիային

Թուրքիայում քրդամետ Ժողովուրդների դեմոկրատական կուսակցության հայ պատգամավոր Կարո Փայլանը Ֆրանսիայի նախագահ Էմանուել Մակրոնի հետ հանդիպման ընթացքում բարձրացրել է Աֆրինի հարցը:

Նշենք, որ Ֆրանսիայի Հանրապետության նախագահ Էմանուել Մակրոնը մասնակցել է Ֆրանսիայի հայկական կազմակերպությունների համակարգող խորհրդի կազմակերպած ամենամյա ընթրիքին, որի պատվո հյուրն է եղել Թուրքիայի Մեջլիսի հայ պատգամավոր Կարո Փայլանը:

Ընթրիքի ընթաքում Փարիզի քաղաքապետ Անն Իդալգոն, Փայլանին հանձնելով իր և Փարիզի քաղաքային խորհրդի կողմից շնորհված մեդալը, ասել է, որ Թուրքիայի խորհրդարանի հայ պատգամավորն աչքի է ընկնում իր քաջությամբ, որ նրա կյանքն ամեն օր վտանգվում է, նա հերոս է` ժողովրդավարության, մարդկանց իրավունքների համար պայքարի հերոս, և մեդալը, որ շնորհվում է, հավաստիքն է այն բանի, որ Ֆրանսիան պատգամավորի կողքին է այդ պայքարում:

Փայլանը Ֆրանսիայի նախագահին հայտնել է այն մասին, որ Աֆրինում Թուրքիայի իրականացրած գործողությունների ընթացքում զոհվող խաղաղ բնակիչների թիվը գնալով աճում է:

Ուշագրավ է, որ Մակրոնը Փայլանի հետ զրույցից հետո կոչ է արել Թուրքիային` գործողություններ իրականացնելուց առաջ խորհրդակցել դաշնակիցների հետ: