ԱՎԾ պետը պարզաբանում է՝ ինչու չպատասխանեց պատգամավորների հարցերին

ԱՎԾ պետ Ստեփան Մնացականյանը  համարում է, որ հասարակությունը վիճակագրական ծառայությունը պետք է ընկալի որպես կոնկրետ քաղաքականությամբ կողմնորոշված պետական այլ մարմիններից արմատապես տարբերվող պետական կառուցվածք: Նման կարծիք նա հայտնեց խորհրդարանում` լրագրողների հետ զրույցում անդրադառնալով հարցին՝ ինչո՞ւ ինքը չպատասխանեց պատգամավորների հարցերին:

Ավելի վաղ հայտնել էինք, որ «Ելք» խմբակցության ղեկավար Նիկոլ Փաշինյանը դժգոհել էր, որ հնարավորություն ընձեռված չէ գնաճի մեղմացման թեմայով խորհրդարանական լսումների ժամանակ հարցեր ուղղել ԱՎԾ պետին:

«Հասարակությունը պետք է վիճակագրական ծառայությունն ընկալի  որպես կոնկրետ քաղաքականության կողմնորոշված պետական այլ մարմիններից արմատապես տարբերվող պետական կառուցվածք և վիճակագրական ծառայությանը չներքաշի քաղաքական վարչական ու այլ շահերի կոնֆլիկտներում, իսկ քննարկվող հարցը վերաբերում էր գների աճի պատճառներին: ԱՎԾ-ն զբաղվում է միայն փաստագրմամբ»,- ասաց Մնացականյանը:

Նա նշեց, որ ԱՎԾ-ն պարտավոր է առաջնորդվել միջազգային կազմակերպությունների կողմից սահմանված ստանդարտներով և դրանցից բխող մեթոդաբանությամբ: