Թուրքիայի մեջլիսում արաբերեն ելույթ ունենալու համար քրդամետ պատգամավորին դիտողություն են արել

Այսօր արաբերենի միջազգային օրն է:

Թուրքիայում քրդամետ Ժողովուրդների դեմոկրատական կուսակցության պատգամավոր Ահմեդ Ալի Ասլանն այդ առիթով արաբերենով է ելույթ ունեցել: Ըստ Demokrtahaber-ի՝ այդ պատճառով մեջլիսում իրարանցում է սկսվել: Իշխող «Արդարություն  և զարգացում» կուսակցության անդամ, մեջլիսի նախագահի տեսակալ Ահմեդ Այդընը զգուշացրել է պատգամավորին՝ ասելով, որ օտարալեզու ոչ մի ելույթ չի գրանցվում:

«Երբ Օբաման եկել էր, անգլերեն ելույթ էր ունեցել, և դրանք արխիվացվել էին: Տասը հազարավոր կիլոմետր հեռավորության վրա գտնվող մարդկանց լեզուն անցնում է, արաբերենը` ո՞չ: Ափսոսում եմ»,- պատասխանել է պատգամավորը՝ ելույթն արաբերենով շարունակելով: