Ոչ թե թանկացում է, այլ շուկայի խնդիր. Իգնատի Առաքելյանը` տավարի մսի թանկացման մասին

Մսի թանկացման շուրջ պետք չէ խուճապ ստեղծել, թե` վայ, միսը թանկացավ, ի՞նչ ենք անելու, ոչ մի բան էլ չենք անելու այսօր լրագրողներին ասաց ՀՀ գյուղատնտեսության նախարար Իգնատի Առաքելյանը:

Նա նշեց, որ իրականում թանկացումը կհանգեցնի ներդրումների ավելացման: Նախարարի հավաստմամբ` շուկայում ոչխարի միսը թանկացել է արտահանման պատճառով, բացի այդ` ոչխարի մսի սպառումն է ավելացել, իսկ խոզի միսը թանկացել է, քանի որ դրա գինը բարձրացել է աշխարհում: Ինչ վերաբերում է տավարի մսի թանկացմանը, ապա, ըստ Առաքելյանի, այն թանկացել է միայն 100-150 դրամով:

«Շուկա է` կթանկանա էլ, կէժանանա էլ: Ես չեմ ասում` թանկացում չկա, բայց արտառոց իրավիճակ չկա, շուտով շուկան կկարգավորվի: Թեև կա նաև անասնակերի թանկացում, գյուղացին ինքը կովի ու խոզի մսի գինը չի թանկացրել, քանի որ նրանք իրացման ու ֆինանսական խնդիրներ ունեն: Այսինքն` սա թանկացում չէ, այլ շուկայի խնդիր` արժույթ է փոխվել, վառելիքն է թանկացել, ինչը կարող է բերել նրան, որ որոշ գներ կարգավորվեն»,- ասաց նախարարը:

Ինչ վերաբերում է հարցին, թե թանկացումների ֆոնին հնարավո՞ր է` մասսայական մորթ լինի, Առաքելյանը պատասխանեց` ոչ, քանի որ գյուղացին գիտի` ինչ մորթի և երբ մորթի: «Եթե խնդիրը հասնի նրան, որ անասնակերի պակասություն լինի, մենք կներմուծենք այն: Սակայն պետք է ասեմ, որ անասնակերով բավարարված են տնտեսությունները»,- ասաց նա:

Ըստ նախարարի` շուտով տուրիստական հոսքը կպակասի և, դրան զուգահեռ, կքչանա նաև մսի սպառումը, ու շուկան կամաց-կամաց կկարգավորվի: