ՌԴ կրթության նախարարի այցը Հայաստան ռուսաց լեզվի հայեցակարգի հետ կապ չունի. Լևոն Մկրտչյան

Հայաստանում է Ռուսաստանի կրթության և գիտության նախարար Օլգա Վասիլևան: Նա այսօր այցելեց Խ. Աբովյանի անվան մանկավարժական համալսարան, հանդիպեց ռուսերեն լեզվի դասախոսների և Երևան քաղաքի ռուսերեն լեզվի խորացված ուսուցում իրականացնող դպրոցների ուսուցչական կազմի հետ:

ՀՀ ԿԳ նախարար Լևոն Մկրտչյանը նշեց, որ Վասիլևան Հայաստան է ժամանել կրթության ոլորտի մի շարք հարցերում համագործակցություն հաստատելու համար:

Հարցին, թե որքանո՞վ կապ ունի ՌԴ նախարարի այցը օրերս քննարկվող` ռուսաց լեզվի հայեցակարգի հետ, նախարարը պատասխանեց, որ ոչ մի կապ չունի: «Ռուսաց լեզվի հայեցակարգի հետ այցն ամենևին էլ կապ չունի, իսկ մանկավարժականում ուղղակի ռուսերենի մասնագետների հետ հանդիպում էր` կրկին հայեցակարգի հետ կապ չունեցող»,- վստահեցրեց նա:

Հանդիպման վերջում Օլգա Վասիլևային շնորհվեց մանկավարժական համալսարանի պատվավոր դոկտորի կոչում: