Պուտինը ՌԴ ԱԳՆ-ին հրահանգելու է ԱՄՆ-ի գործողությունների պատճառով դատարան դիմել

ՌԴ նախագահ Վլադիմիր Պուտինը հրահանգելու է երկրի ԱԳՆ-ին` ամերիկյան դատարան դիմել ԱՄՆ-ում ռուսական դիվանագիտական սեփականության առգրավման պատճառով: Այդ մասին նա ասել է Չինաստանում մամուլի ասուլիսի ժամանակ. հայտնում է Независимая газета-ն:

«Ինչ վերաբերում է շենքերին (ԱՄՆ-ում ռուսական դիվանագիտական առաքելության), ապա դա իսկապես աննախադեպ բան է: Ամերիկյան կողմը ՌԴ-ին զրկել է իր սեփականությունից օգտվելու իրավունքից: Դա ռուսակակն կողմի սեփականության իրավունքի ակնհայտ ոտնահարում է: Այդ պատճառով ես նախ կհրահանգեմ ՌԴ ԱԳՆ-ին` դիմել դատարան: Կտեսնենք` ինչպես է աշխատում ամերիկյան գովերգված դատական համակարգը»,- ասել է Պուտինը:

Հիշեցնենք, որ շաբաթ օրը ԱՄՆ իշխանությունները պահանջել էին փակել Սան Ֆրանցիսկոյում ՌԴ հյուպատոսությունը և Վաշինգտոնում ու Նյու Յորքում առևտրային ներկայացուցչությունները: