Որևէ մեկը Քաղծառայության խորհրդի հետ չի կարող հաղորդակցվել «հրահանգելու» միջոցով. պարզաբանում

«Հրապարակ» օրաթերթն այսօր «Ձեռնամուխ է եղել կադրային փոփոխությունների» վերտառությամբ «նյութում» հղում կատարելով ՀՀ Արդարադատության նախարարության աշխատակազմի անանուն ինչ-որ աշխատակիցների, գրել է, թե նախարարության աշխատակազմի՝ ատեստավորման ենթակա քաղաքացիական ծառայողները վտանգի տակ են , քանի որ նրանք, իբր, ինֆորմացիա ունեն, որ Դավիթ Հարությունյանը Նունեի (Նունե Խաչատրյանի) միջոցով «Քաղծառայության խորհրդին հրահանգել է քննություններից կտրել ոմանց, քանի որ «իր մարդկանց պետք է բերի այդ պաշտոններին»: (http://hraparak.am/?p=148988&l=am/)

Որևէ փաստարկ չպարունակող այս տեղեկությունն ամբողջությամբ հերյուրանք է, մտացածին և բացառապես էժան բամբասանք:
Նախ՝ որևէ մեկը ՀՀ Քաղաքացիական ծառայության խորհրդի հետ չի կարող հաղորդակցվել «հրահանգելու» միջոցով, առավելևս՝ միջնորդավորված:

Երկրորդ՝ 2017թ. հունվարի 1-ից սկսած՝ օրենքի ուժով քաղաքացիական ծառայողներն այլևս չեն ատեստավորվում: Հետևաբար ատեստավորումից «կտրվելու» որևէ մտավախություն քաղաքացիական ծառայողներն ունենալ չէին կարող: Քաղաքացիական ծառայության համակարգում ընդգրկված պետական մարմինների, (այդ թվում ՀՀ Արդարադատության նախարարության) աշխատակազմերի քաղաքացիական ծառայող աշխատակիցները տեղյակ են ատեստավորման ինստիտուտի՝ այլևս չգործելու վերաբերյալ: Հետևաբար հրապարակման հեղինակին կհորդորեինք զերծ մնալ անարժանահավատ և չճշտված տեղեկատվության աղբյուրներին հղումներ կատարելուց:


ՀՀ ՔԾԽ նախագահի մամուլի քարտուղար Գոռ Աբրահամյան