Հանձնարարական` բնապահպանական փորձաքննության կատարելագործման վերաբերյալ

Այսօր կառավարության նիստում օրակարգին անցնելուց առաջ ՀՀ վարչապետ Կարեն Կարապետյանը հանձնարարական տվեց բնապահպանական փորձաքննության կատարելագործման անհրաժեշտության վերաբերյալ:

Ներկայումս գործող շրջակա միջավայրի ազդեցության վրա գնահատման և փորձաքննության օրենսդրական կարգավորումներում անհրաժեշտ է վերանայել ընթացիկ գործունեության դասակարգում, ֆինանսավորման աղբյուրները, ժամկետներն ու ընթացակարգերը: Շրջակա միջավայրի պահպանության բնագավառում պահանջվում  է բնապահպանական փորձաքննության պատշաճ, նախատեսելի և ողջամիտ ժամկետների իրականացում՝ ըստ միջազգային չափանիշների լավագույն չափանիշների:

Վարչապետը հանձնարարեց բնապահպանության նախարարին 3 ամսյա ժամկետում մշակել և կառավարության աշխատակազմ ներկայացնել հանրապետության շրջակա միջավայրի ազդեցության գնահատման և փորձաքննության մասին օրենքում փոփոխություններ կատարելու վերաբերյալ առաջարկություններ:

«Պարոն Մինասյան երեք ամիսը մի քիչ շատ չէ՞»,- հարցրեց վարչապետը՝ բնապահպանության նախարարին:

«Կարող ենք մեկ ամսվա ընթացքում էլ անել»,- ասաց Արծվիկ Մինասյանը:

«Ֆիքսեցինք»,- ասաց Կարեն Կարապետյանը: