Որդին Դեբեդ գետում հայտնաբերել է ջրահեղձ եղած մորը

Երեկ տարեց կին է ջրահեղձ եղել Դեբեդ գետում: Ոստիկանությունից Yerkir.am-ին հայտնեցին, որ հունիսի 20–ի առավոտյան` ժամը 10:10-ին, ոստիկանություն է ահազանգել մի քաղաքացի և հայտնել, որ մայրն ընկել է Դեբեդ գետն ու խեղդվել:

Դեպքի վայր մեկնած օպերատիվ խումբը պարզել է, որ հունիսի 19–ին` երեկոյան 9-ի սահմաններում, 1933-ին ծնված կինը դուրս է եկել տանից, գնացել Դեբեդ գետի մոտ գտնվող իրենց այգի ու տուն չի վերադարձել: Հաջորդ օրն առավոտան` 9:30–ի սահմաններում, որդին մոր դիակը հայտնաբերել է այգուց մի քանի մետր հեռու՝ Դեբեդ գետում:

Դիակի զնությամբ կնոջ մարմնի վրա բռնության հետքեր չեն հայտնաբերվել: Նշանակվել է դատաբժշկական փորձաքննություն, դեպքի կապակցությամբ նյութեր են նախապատրաստվում: