Աչքի մեջ բավական մեծ օտար մարմին է եղել. վիրավոր զինծառայողին վիրահատել են

Տեղեկացրել էինք, որ Արցախի սահմանին աչքի վիրավորում և այրվածքներ ստացած 33­-ամյա պայմանագրային զինծառայող Մյասնիկ Հովհաննիսյանին տեղափոխել են Կենտրոնական զինվորական հոսպիտալ: Երեկ զինծառայողը տեղափոխվել է Մալայանի անվան ակնաբուժական կենտրոն, որտեղ վիրահատվել է:

Yerkir.am-ին հիվանդանոցից հայտնեցին, որ վիրահատությունը հաջող է անցել, զինծառայողի առողջական վիճակն անձամբ ՀՀ ԱՆ գլխավոր ակնաբույժ, պրոֆեսոր Ալեքսանդր Մալայանի հսկողության ներքո է:

«Վիրահատությունն իրականացրել է մեր վնասվածքաբանության բաժանմունքի վարիչ, պրոֆեսոր Արմեն Վարդանյանը: Ներակնային բավական մեծ օտար մարմին է եղել մի աչքի մեջ, որը հեռացվել է, իսկ մյուսը նույնպես վնասված է եղել` կրկին օտար մարմինների` աչքին բախման հետևանքով: Զինծառայողը դեռ պետք է բուժում ստանա»,- տեղեկացրեցին հիվանդանոցից:

Զինվորի վիճակը բժիշկները գնահատում են միջին ծանր: