Օրենքն ընդունելուց հետո իմ ծխելը չեք տեսնի. Ալիկ Սարգսյան

Ծխախոտի թանկացումը ծխելու դեմ պայքարի արդյունավետ միջոց չէ. այսօր խորհրդարանում լրագրողներին ասաց ՀՀԿ-ական պատգամավոր, նախկին ոստիկանապետ Ալիկ Սարգսյանը:

Պատգամավորի խոսքով՝ ծխախոտի գնի բարձրացումը չի կարող արդյունավետ պայքար համարվել, իսկ ծխելու դեմ պայքարելու մեխանիզմների վերաբերյալ էլ այսպիսի տեսակետ հայտնեց. «Լուծումներն արհեստածին խոչընդոտներն են, որոնք պետք է ստեղծվեն: Ամբողջ Եվրոպայում մարդկանց համար պայմաններ են ստեղծվել: Դրա մեջ նսեմացուցիչ ինչ-որ բան կա: Ես էլ հիմա անհարմար եմ զգում ծխել, հատկապես` երեխաների ներկայությամբ: Պրոպագանդում են, որ ծխելը իբրև թե տղամարդկային ինչ-որ բան է, բայց դրա մեջ չկա որևէ լավ բան»:

Սարգսյանը նշեց, որ եթե օրինագիծն ընդունվի, ապա ինքը պատրաստ է հարգել այն և թողնել ծխելը: «Պատրաստ եմ թողնել ծխելը` հանուն ընդհանուր գործի, հանուն այդ չարիքի դեմ պայքարի: Օրենքն ընդունելուց հետո իմ ծխելը չեք տեսնի»,- հայտարարեց նա: