«Երկիր ծիրանի»-ն քարոզարշավը սկսեց հեծանվաերթով

Այսօր Երևան քաղաքի ավագանու նախընտրական քարոզարշավի շրջանակներում՝ քաղաքապետի թեկնածու Զարուհի Փոստանջյանը քարոզարշավը սկսեց Ազատության հրապարակից:

«Մեր քարոզարշավը սկսեցինք հեծանվային արշավով, որովհետև ցանկանում ենք, որ մեր քաղաքում հեծանիվների առկայությունը շատ լինի թե՛ էկոլոգիական տեսանկյունից, և թե՛ առողջապահության: Դա է քաղաքակիրթ մոդելը, ոչ թե երկու-երեք-հինգ-վեց մետրանոց մեքենաներ մարդիկ պետք է շրջեն Երևանում, այլ նաև ունենան հնարավորություն երթևեկելու հեծանիվներով»,- ընդգծեց Զարուհի Փոստանջյանը:

Զարուհի Փոստանջյանը նաև նշեց, որ հարկավոր է ունենալ ընդհանուր մոտեցում քաղաքի ճարտարապետաշինարարության վերաբերյալ: Եվ, եթե այդ ընդհանուր մոտեցումը չկա, ապա իհարկե միայն կենտրոնով չենք կարող հարցերը լուծել:

Ըստ Փոստանջյանի՝ քանի դեռ չունենք վերաբերմունք քաղաքի կենտրոնի նկատմամբ, որով պետք է հստակ մատնանշվեն այն ինչ-որ չի թույլատրվում քաղաքի կենտրոնում, մինչև դա չլինի, արվարձաններին այստեղից նոր հարկավոր է հասնել: