«Երկիր ծիրանի»-ն պայքարելու է կոռուպցիայի դեմ, բայց չի ասում` ինչպես

Այսօր «Երկիր ծիրանի»  կուսակցության անդամ, Երևանի ավագանու ընտրությունների թեկնածու  Սոնա Աղեկյանը փորձեց լրագրողներին ներկայացնել կուսակցության Երևանի ավագանու ընտրությունների վերաբերյալ պատկերացումներն ու անելիքները: Նա նշեց, որ «Երկիր ծիրանի»-ն քաջատեղյակ է քաղաքի խնդիրներին ու ցանկանում է Երևանը դարձնել հարմարավետ: Սկսելու են կոռուպցիայի դեմ պայքարից, հետո զարգացնելու են մշակույթը, տրանսպորտը, գալիս են ազատագրելու մայրաքաղաքը աղբից և հաստատվելու Արգիշտի 1 հասցեում:

Լրագրողներին հարցին, թե ինչպե՞ս են պայքարելու կոռուպցիայի դեմ, «Երկիր ծիրանի» կուսակցության անդամը չկարողացավ պատասխանել` ասելով միայն, որ գիտի, թե ով է ստեղծել կոռուպցիոն համակարգը մեր երկրում, դա ՀՀԿ-ն է:

«Կոռուպցիայի դեմ պայքարելու համար ունենք մշակված հատուկ մեխանիզմներ: Այս պահին չեմ կարող ասել, լիազորված չեմ ասել, առանձին կարող եմ ասել»,- ասաց նա` այդպես էլ չասելով, թե դրանք ինչ մեխանիզմներ են, բայց վստահեցրեց, որ կպայքարեն կոռուպցիայի դեմ  ու արդարություն կբերեն քաղաք: