Լուծել չգազաֆիկացված տարածքների ջեռուցման հարցը. վարչապետ

Այսօր կառավարության նիստում օրակարգին անցնելուց առաջ վարչապետ Կարեն Կարապետյանն անդրադարձավ հանձնարարականներին: Դրանից մեկը վերաբերում էր չգազաֆիկացված տարածքներում առկա մի քանի խնդիրներին: Վարչապետի խոսքով` բազմիցս է հայտարարվել, որ Հայաստանում գազաֆիկացումը 96-97 տոկոս է, ինչը աննախադեպ բարձր է, քան կամայական այլ երկրում, որը չունի ներքին էներգառեսուրս:

Սակայն մարզերում բազմաթիվ հանդիպումների ժամանակ բարձրացվել են խնդիրներ, ըստ որի չգազաֆիկացման տարածքներում առկա են ջեռուցման և կենցաղային նվազագույն պայմանների ստեղծման խնդիրներ: Ուստի հանձնարարվեց մարզպետներին, համայնքների ղեկավարների հետ համատեղ քննարկել և կառավարության աշխատակազմ ներկայացնել գազաֆիկացման խնդիրների վերաբերյալ ամփոփ տեղեկատվություն: Հանձնարարվեց էներգետիկ ենթակառուցվածքբերի և տարածքային զարգացման նախարարներին քննարկել գազաֆիկացման խնդիրները Գազպրոմ-Արմենիայի ներկայացուցիչների հետ:

«Իմ նախնական սպասումները հետևյալն են, այն տարածքները, որոնք չունեն գազ, քիչ հավանական է, որ այնտեղ տրամաբանական կլինի գազաֆիկացումը, քանի որ այդտեղ ապրող բնակիչները քիչ են, սակայն այդ վայրերի ջեռուցման համար պետք է քննարկել բոլոր տարբեևրակները և ընտրել լավագույն տարբերակը»,- ասաց Կարեն Կարապետյանը: