Ստուգվելու է ոչ թե ներկրվող, այլ ներքին մանրածախ շուկայում առկա նավթամթերքը. նախարար

Այսօր լրագրողների հետ զրույցում տնտեսական զարգացման և ներդրումների նախարար Սուրեն Կարայանն անդրադարձավ դիզվառելիքի շուկային վերաբերող` վարչապետի հանձնարարականին: Նշենք, որ վարչապետը հանձնարարել էր նավթամթերքի շուկայի որակը ստուգել:

Հարցին, թե արդյո՞ք ստացվում է, որ նավթամթերք ներկրող խոշոր ընկերությունները տարիներ շարունակ խաբել են սպառողին` վաճառելով անորակ նավթամթերք, Սուրեն Կարայանը պատասխանեց, որ համակարծիք չէ այդ պնդմանը: «Եթե նավթամթերքը ներմուծվում է ԵՏՄ-ից, ապա դա ուղեկցվում է որակի վերաբերյալ համապատասխան սերտիֆիկատով, իսկ եթե այն ներմուծվում է երրորդ երկրից, ապա մենք ինքներս ենք ստուգում որակը»,- ասաց նա:

Ըստ նախարարի` ստուգելու են մանրածախ շուկայում առկա նավթամթերքի որակը, այսինքն` ստուգման ենթակա է ոչ թե ներմուծվող, այլ ներքին մանրածախ շուկայում առկա նավթամթերքը: