Հայաստանն ու համանախագահ պետությունները խոսում են մի լեզվով. Սերժ Սարգսյանի հոդվածը` Известия-ում

Հայաստանի Հանրապետության նախագահ Սերժ Սարգսյանը ռուսական Известия պարբերականում հրապարակած հոդվածում անդրադարձել է ԼՂ հակամարտության կարգավորմանը:

Նա  նշել է, որ Հայաստանը, լինելով ԼՂՀ-ի բնակչության անվտանգության երաշխավորը, շարունակում է հետևողական ու կառուցողական ջանքեր գործադրել ԵԱՀԿ ՄԽ ձևաչափում ԼՂ հակամարտության խաղաղ կարգավորման տարբերակներ գտնելու համար:

Սարգսյանը նշել է, որ 2016-ի ապրիլին Ադրբեջանի իրականացրած նոր ագրեսիան էական վնաս հասցրեց բանակցային գործընթացին, իսկ 2017-ի փետրվարի 24-ի լույս 25-ի գիշերը շփման գծում արձանագրված իրավիճակի սրումը ցույց տվեց, թե որքան հրատապ է շփման գծում հրադադարի պահպանման ռեժիմի վերահսկմանն ուղղված հետաքննության մեխանիզմների ներդրման մասին համաձայնագիրը:

«Բաքվում մեր հակագործընկերները պետք է հասկանան, որ Հայաստանն ու համանախագահ պետությունները խոսում են մի լեզվով` քաղաքակիրթ աշխարհում բանակցություններին այլընտրանք չկա, պատերազմը խնդիրների լուծման տարբերակ չէ, և միայն երկխոսության, այլ ոչ վերջնագրերի միջոցով է հնարավոր  հասնել  խաղաղության: Մենք ելնում ենք դրանից, որ ժողովրդի սեփական ճակատագիրը տնօրինելու իրավունքը ժամանակակից աշխարհակարգի անբաժան մասն է: Եվ հենց դրա հիման վրա պետք է լուծվի ԼՂ հակամարտությունը»,- նշել է ՀՀ նախագահը: