Նախկին թաղապետերը միավորվում են Հովհաննես Վարդանյանի շուրջ

Արաբկիր վարչական շրջանի նախկին ղեկավար Լևոն Հարությունյանը խորհրդարանական ընտրություններում սատարելու է Արաբկիր վարչական շրջանի գործող ղեկավար, ռեյտինգային ընտրակարգով ՀՅԴ-ի առաջադրած թեկնածու Հովհաննես Վարդանյանի թեկնածությունը:

 Այս մասին Հարությունյանը հայտնեց Yerkir.am-ի հետ զրույցում:

«Մենք Հովհաննես Վարդանյանի հետ հին ընկերներ ենք, երկար ճանապարհ ենք միասին անցել և դեռ երկար ճանապարհ ունենք անցնելու: Հովհաննես Վարդանյանն, իրոք, նվիրյալ է, դեռ 90-ականների սկզբներից եմ ճանաչում իրեն, նաև միասին աշխատել ենք»,-ասաց Հարությունյանը եւ ընդգծեց, որ կօգնի, ինչով կարող է:

Արաբկիրի վարչական շրջանի նախկին ղեկավարը նշեց, որ թեև քաղաքականությունից հեռացել է, բայց հուսով է, որ ընտրությունները հանգիստ եւ խաղաղ կանցնեն, որ կյանքն ընտրություններով չի ավարտվում:

Նշենք, որ Լևոն Հարությունյանը Արաբկիր վարչական շրջանի թաղապետ է եղել 2002-2005թթ. /այդ ժամանակ ընտրովի պաշտոն էր-խմբ./: Հիշեցնենք, որ Հովհաննես Վարդանյանի թեկնածությունը սատարելու մասին է հայտարարել նաև Արաբկիր վարչական շրջանի նախկին թաղապետ Հովհաննես Շահինյանը: