Սիրիայի ԱԳՆ-ն կոչ է արել փախստականներին հայրենիք վերադառնալ

Սիրիայի արտգործնախարար Վալիդ Մուալլեմը կոչ է արել պատերազմի պատճառով հարևան երկրներ հեռացած համաքաղաքացիներին վերադառնալ հայրենիք՝ Սիրիայի ղեկավարության անունից խոստանալով նրանց ապահովել խաղաղ կյանքի համար անհրաժեշտ պայմաններով։

Վալիդ Մուալլեմը Դամասկոսում հանդիպել է փախստականների հարցերով ՄԱԿ-ի գերագույն հանձնակատար Ֆիլիպո Գրանդիի հետ։ Զրույցի ընթացքում քննարկվել են սիրիացի փախստականներին օգնություն տրամադրելու շրջանակում երկկողմ հարաբերությունների հարցեր։

«Մուալլեմը դարձյալ կոչ է արել հարևան երկրներում գտնվող սիրիացի փախստականներին վերադառնալ հայրենիք՝ հավաստիացնելով, որ պետությունը պատրաստ է նրանց նորից ընդունել ու ապահովել խաղաղ կյանքի համար անհրաժեշտ ամեն ինչով»,- հայտնում է սիրիական ազգային ՍԱՆԱ գործակալությունը։

Իտալացի դիվանագետը իր հերթին նշել է, որ միջազգային կազմակերպությունները ցանկություն ունեն ընդլայնել համագործակցության մասշտաբները Սիրիայի ղեկավարության հետ սիրիացի փախստականներին օգնելու հարցում։