Էրդողանն իջնում է «մեյդան»՝ սահմանադրական փոփոխությունների նախընտրական քարոզարշավը գլխավորելու

Թուրքիայի նախագահ Ռեջեփ Թայիփ Էրդողանը կշրջի երկրի 40 նահանգում՝ սահմանադրական փոփոխությունների վերաբերյալ հանրաքվեից առաջ մեկնարկած նախընտրական քարոզարշավին մասնակցելու:

«Էրդողանն իջնում է մեյդան» վերնագրված հրապարակման մեջ Demokrathaber կայքը տեղեկացրել է, որ երկրի նախագահը նահանգներ այցելությունների ընթացքում հավաքվածներից կպահանջի «այո» ասել հանրաքվեի ժամանակ:

Բացի նախընտրական նախընտրական հանրահավաքներից, նա նաև կմասնակցի մի շարք հեռուստատեսային ծրագրերի, որոնց ընթացքում կպատմի առաջարկվող` կառավարման նախագահական համակարգի մասին:

Հիշեցնենք, որ հունվարի 21-ին մեջլիսում ձայների մեծամասնությամբ հավանություն է տրվել Սահմանադրությունում փոփոխությունների իրականացման փաթեթին, որն առաջարկում է անցնել կառավարման նախագահական համակարգին: 18 հոդվածից բաղկացած օրենքի ընդունմանը կողմ է քվեարկել 339 պատգամավոր: Վերջնական որոշումը հանրաքվեից է կախված: