Մհեր Սեդրակյանի հովանավորյալ թաղապետն ազատվեց պաշտոնից

Երևանի քաղաքապետ Տարոն Մարգարյանը, ղեկավարվելով ՀՀ աշխատանքային օրենսգրքի 112-րդ հոդվածի 1-ին մասով և «Երևան քաղաքում տեղական ինքնակառավարման մասին» ՀՀ օրենքի 52-րդ հոդվածի 1-ին մասի 7-րդ կետով, Երևանի Էրեբունի վարչական շրջանի ղեկավար Արմեն Հարությունյանին ազատել է աշխատանքից: 

Երևանի քաղաքապետի մեկ այլ որոշմամբ Էրեբունի վարչական շրջանի ղեկավար է նշանակվել Դավիթ Գրիգորյանը: Այս մասին տեղեկանում ենք Երևանի քաղաքապետարանի տեղեկատվության և հասարակայնության հետ կապերի վարչությունից: 

Նշենք, որ Հարությունյանը վայելում էր ՀՀԿ-ական պատգամավոր Մհեր Սեդրակյանի հովանավորությունը: Վերջինս, ի դեպ, ըստ մամուլի համառ հրապարակումների, շուտով դուրս է գալու ՀՀԿ-ից: