Կարո Փայլանը նախարարությանը հարց է ուղղել Ստամբուլի որոշ դպրոցներում Ամանորը տոնելու արգելքի վերաբերյալ

Թուրքիայի Ժողովուրդների դեմոկրատական կուսակցության պատգամավոր Կարո Փայլանը խորհրդարանում ելույթի ժամանակ ընդդիմացել է Ստամբուլի որոշ դպրոցներում Ամանորը նշելու արգելքին:

Ըստ Demokrathber-ի՝ Փայլանը դպրոցներում Ամանորը նշելու արգելքի վերաբերյալ մի քանի հարց է ուղղել Թուրքիայի կրթության և գիտության նախարարին:

«Ի՞նչ է նկատի ունեցել կոմիտեն՝ ասելով «Ամանորը մեր մշակութային ավանդույթներին անհամապատասխան է»: Արդյո՞ք Թուրքիայի կրթության և գիտության նախարարությունում տեղյակ են Ամանորի և քրիստոնեական Սուրբ Ծննդի տոների միջև եղած տարբերության մասին: Այն պարագայում, երբ մեր երկրում Ամանորից առաջ ամբողջ ժողովուրդը գնում է տոնական լոտոյի տոմսեր, ինչո՞ւ է որպես խնդիր դիտարկվում դպրոցներում երեխաների՝ նվերներով փոխանակվելը»,- հարցրել է պատգամավորը: