Կյանքի կկոչվեն ընտրական գործընթացի հետ կապված քաղաքական համաձայնությունները

Այսօր կառավարության նիստում կառավարության աշխատակազմի ղեկավար-նախարար Դավիթ Հարությունյանը ներկայացրեց որոշում ընտրական տեղամասերում տեսանկարահանումը և ուղիղ հեռարձակումը կազմակերպելու, նույնականացման քարտերի և անձնագրերի շտեմարանի աուդիտը կազմակերպելու, էլեկտրոնային սարքերով քվեարկողների գրանցման համակարգի ներդրման ընթացքը մշտադիտարկելու նպատակով հանձնաժողովի կազմավորման և գործունեության կարգը սահմանելու վերաբերյալ:

Նախագծի նպատակն է կյանքի կոչել քաղաքական համաձայնությունները, որոնք ստորագրվել են` ընտրական գործընթացի հետ կապված: Նախագծով առաջարկվում է ստեղծել եռակողմ հանձնաժողով`  խորհրդարանական մեծամասնության և խորհրդարանական ընդդիմության հավասար ներկայացվածությամբ: Հանձնաժողովի առաջ դրվում է երեք հիմնական խնդիր` կազմակերպել գնումները ընտրական տեղամասերում տեսանկարահանման և ուղիղ հեռարձակման համար, երկրորդ` նույնականացման քարտերի և անձնագրերի շտեմարանի առումով միջազգային աուդիտի կազմակերպում, և երրորդ` էլեկտրոնային սարքերով քվեարկողների գրանցման համակարգի ներդրում և ընթացքի մշտադիտարկում:

Դավիթ Հարությունյանը նշեց, որ որոշումը քննարկվել է նաև խորհրդարանական ընդդիմության հետ: Որոշումն ընդունվեց: