Կառավարության ծրագիրը մանրամասն քննարկվել է ՀՀԿ-ի և ՀՅԴ-ի հետ. վարչապետը՝ ԱԺ-ում

Այսօր ԱԺ արտահերթ նիստում քննարկվում է նոր կառավարության ծրագիրը: Այն ներկայացնում է վարչապետ Կարեն Կարապետյանը:

Վարչապետը նախ նշեց, որ այդ ծրագիրը ներկայացնում է իր թիմի տեսլականը, որ դրա մշակման ընթացքում բազմաթիվ հանդիպումներ ու առարկայական քննարկումներ են եղել ՀՀ նախկին վարչապետերի, նախարարների, պետական կառավարման հարուստ փորձ ունեցող մի շարք քաղաքական գործիչների, հայ և օտարերկրյա տնտեսագետների, փորձագետների, բիզնես աշխարհի ներկայացուցիչների, երկրի ապագայի նկատմամբ ոչ անտարբեր մարդկանց հետ: Կարապետյանի խոսքով` մանրամասն քննարկումներ են տեղի ունեցել ՀՀԿ-ի և ՀՅԴ-ի հետ:

«Կառավարության ծրագիրը միջոցառումների համալիր է` սահմանված ժամկետներով: Կառավարության նպատակն է հանրապետությունում բարեփոխումների միջոցով ապահովել գերագույն արժեքներ` ՀՀ քաղաքացու պաշտպանվածությունը, արժանապատվությունը, կենսամակարդակի բարձրացումը, արդար հասարակության մեջ ապրելը, ապագայի նկատմամբ լավատեսությունը»,- ասաց վարչապետը:

Ըստ նրա` Հայաստանը թևակոխել է տարածաշրջանային զարգացումների նոր փուլ, որը ենթադրում է տնտեսական աճի ցածր տեմպեր երկրի տնտեսական գործընկերների մոտ` սահմանափակելով  ընդհանուր թրենդների հաշվին տնտեսական աճի հնարավորությունները: