«Հայ բիճեր» վանկարկման պատճառով Փայլանը դատի կտա Էրդողանին

Թուրքիայի Մեջլիսի  հայ պատգամավոր Կարո Փայլանը հայտարարել է, որ Տրապիզոնում հանրահավաքի ժամանակ Էրդողանի ներկայությամբ հնչեցված հակահայկական վանկարկումների համար հայց է ներկայացնելու դատարան: Այդ մասին տեղեկանում ենք Haber.sol.org կայքից:

«Նախագահի՝ Տրապիզոնում տեղի ունեցած ելույթի պահին «ազգը» հայհոյում է հայությանը: Էրդողանը ոչ մի միջամտություն չի ցուցաբերում: Վաղը բողոքի հայց եմ ներկայացնելու»,-  իր Twitter-յան էջում գրել է պատգամավորը:

Հիշեցնենք, որ Թուրքիայի նախագահ Ռեջեփ Թայիփ Էրդողանի մասնակցությամբ հերթական սկանդալն է տեղի ունեցել Տրապիզոնում (թուրքերեն՝ Տրաբզոն): Նրա ելույթի ընթացքում հավաքված ամբոխն սկսել է հակահայկական վանկարկումներ անել: «Հայ բիճերը մեզ չեն վհատեցնի» վանկարկող ամբոխին լռեցնելու կամ դիտողություն անելու փոխարեն Էրդողանը շարունակել է ելույթը: Համացանցում տարածված տեսանյութում երևացել է նաև Էրդողանի և նրա կողքին կանգնածների լայն ժպիտը հայատյաց վանկարկումների ընթացքում: