Թուրքիայում ձերբակալել են Ֆեթթուլահ Գյուլենի եղբորը

Թուրքիայի Իզմիր նահանգում ձերբակալվել է իսլամի քարոզիչ, ամերիկաբնակ միլիարդատեր Ֆեթթուլահ Գյուլենի եղբայրը` Քութբեթթին Գյուլենը: Ըստ թուրքական Yenisafak թերթի կայքի` հետախուզության մեջ գտնվող Քութբեթթին Գյուլենը գյուլենական համայնքի դեմ տարվող հետաքննության շրջանակներում մեղադրվում է «զինված խմբավորմանը անդամակցելու» մեջ. տեղեկացնում է Ermenihaber-ը:

Ըստ աղբյուրի` Գյուլենի եղբայրը հայտնաբերվել է Իզմիրի  Գազիէմիր թաղամասում գտնվող` հարազատներից մեկի տանը:

Հիշեցնենք, որ ԱՄՆ-ում բնակվող  Ֆեթթուլահ Գյուլենին թուրքական իշխանությունները մեղադրում են հուլիսի 15-ին Թուրքիայում տեղի ունեցած ռազմական հեղաշրջման փորձի կազմակերպման մեջ: Այդ իսկ պատճառով երկրով մեկ սկսվել են զանգվածային ձերբակալություններ: Ձերբակալվում են նաև Գյուլենի մերձավորները և հարազատները, իսկ Թուրքիայի իշխանությունները ԱՄՆ-ից պահանջում են արտահանձնել Գյուլենին: