Մերձմոսկվայում հայ տաքսիստը 5-ամյա երեխային փրկել է այրվող մեքենայից

Մերձմոսկվայում 38-ամյա հայ տաքսիստ Արա Ջանասլանյանը այրվող մեքենայից դուրս է բերել 5-ամյա երեխայի` փրկելով նրա կյանքը: Փոքրիկի հայրը նրան թողել է մեքենայի մեջ եւ բարձրացել տուն: Եւ երբ նայել է պատուհանից, տեսել է, որ «Նիվան» ծխի մեջ կորած է: 

Բարեբախտաբար, այդ պահին պատվերով բակում է եղել նաեւ Արան: Նա նկատել է այրվող մեքենան, եւ ներկաներից միակն է եղել, ով փորձել է որեւէ կերպ միջամտել: Ինչպես ներկայացնում է «Մոսկովսկի կոմսոմոլեցը», Արան մեծ դժվարությամբ բացել է մեքենայի դուռը եւ դուրս բերել երեխային, ով առաջին եւ երկրորդ կարգի այրվածքներ է ստացել: 5-ամյա երեխան առաջինը, ինչ  ասել է Արային, եղել է հետեւյալը. «Մենակ հայրիկիս չասեք, նա կջղայինանա»:

Նախնական տվյալներով հրդեհի պատճառն այն է եղել, որ երեխան խաղացել է կրակայրիչով:

Արան նույնպես այրվածքներ է ստացել, սակայն հրաժարվել է հոսպիտալացվել: