Հայաստանը մշակույթի ոլորտում կհամագործակցի Մալթայի հետ

Կառավարության նիստի վաղվա օրակարգում մշակույթի նախարարությունը ներառել է ՀՀ կառավարության  և Մալթայի Հանրապետության կառավարության միջև մշակույթի բնագավառում համագործակցության մասին» համաձայնագրի կնքման հարցը:

Երկու պետությունները, վստահ լինելով, որ մշակույթի բնագավառում փոխանակման գործընթացները և համագործակցությունը կնպաստեն երկու ժողովուրդների և մշակույթների լավագույն ճանաչմանն ու ընկալմանը, կնքում են համաձայնագիր մշակույթի բնագավառում համագործակցություն ծավալելու ուղղությամբ:

Կողմերը կնպաստեն իրենց երկրների արվեստի և մշակույթի ճանաչմանը փոխադարձ այցելությունների և մշակութային միջոցառումների փոխանակման ծրագրերի միջոցով: Կողմերը կնպաստեն երկու երկրների պատմության և մշակույթի վերաբերյալ գրքերի, հրապարակումների, մատենագիտական նյութերի և տեսալսողական տեխնիկական միջոցների փոխանակմանը, ինչպես նաև երկու երկրների գրադարանների միջև ուղիղ համագործակցությանը, կաջակցեն նաև ազգային գրականության թարգմանություններին` թարգմանված երկրորդ կողմի լեզվով: Կողմերը կզարգացնեն համագործակցությունը երաժշտության, բեմական արվեստների, թատրոնի, օպերայի, բալետի և այլ բնագավառներում: