Սարգսյան-Ալիեւ հանդիպման մասին` ՌԴ ԱԳՆ կայքի նյութը խմբագրվել է

Երեկ, ըստ ՌԴ ԱԳՆ կայքի, ՌԴ փոխարտգործնախարար Գրիգորի Կարասինն ընդունել է Ֆրանսիայի դեսպան Ռիպերին` վերջինիս խնդրանքով: Դեսպանին ուղեկցել է ԵԱՀԿ ՄԽ ֆրանսիացի համանախագահ Պիեռ Անդրիեն: Զրույցի ընթացքում, ի թիվս այլ հարցերի, քննարկվել է նաև Սանկտ Պետերբուրգում ԼՂ հակամարտության հարցով եռակողմ գագաթաժողով նախապատրաստելու հարցը:

Այսօր արդեն РИА Новости-ն, ԱԳՆ-ում իր աղբյուրին հղումով, տեղեկացնում է, որ Ռուսաստանի, Հայաստանի և Ադրբեջանի նախագահներ Վլադիմիր Պուտինի, Սերժ Սարգսյանի և Իլհամ Ալիևի հանդիպումը կկայանա Պետերբուրգում հունիսի վերջին:

Նշենք, որ ՌԴ ԱԳՆ կայքում հրապարակված տեղեկությունը վերոնշյալ բովանդակությունն ուներ երեկ, այսօր արդեն տեքստից հանվել է այն հատվածը, որը վերաբերում է ԼՂ հակամարտության հարցով եռակողմ գագաթաժողով նախապատրաստելուն:

ՀՀ ԱԳՆ մամուլի խոսնակ Տիգրան Բալայանից Yerkir.am-ը հետաքրքրվեց` իրականում լինելո՞ւ է բարձր մակարդակի հանդիպում: «Բարձր մակարդակով հանդիպումների մասին մենք պատշաճ ժամանակում ներակայացնում ենք»,- ասաց  նա` չցանկանալով մանրամասնել: