Գիշերը Թալիշում զոհված 19-ամյա զինվորի մարմինն այսօր երեկոյան կտեղափոխեն հայրենի գյուղ

Արդեն հայտնել ենք, որ անցած գիշեր հակառակորդի կողմից կրակի դադարեցման պայմանավորվածության խախտման արդյունքում հյուսիսային (Թալիշ) ուղղությամբ մահացու վիրավորում են ստացել ՊԲ զինծառայողներ Գարիկ Մնացականի Մովսիսյանը (ծնվ. 1997թ.) և Վազգեն Հենրիկի Հարությունյանը (ծնվ. 1968թ.):

Գարիկ Մովսիսյանը Տավուշի մարզի Զորական գյուղից էր: Զորականի գյուղապետ Սուրեն Մարտիրոսյանը Yerkir.am-ի հետ զրույցում պատմեց, որ Գարիկը մեկ տարվա ծառայող էր, ընտանիքի երկրորդ արու զավակը:

«Նրանց ընտանիքը սրանից 15-20 տարի առաջ թունավորվել էր, քույրը մահացել էր: Գարիկը ունի նաև իրենից մեծ եղբայր` 26-27 տարեկան: Նա պարտադիր զինծառայությունը կատարել է և վերադարձել տուն: Բացի հորից ու մորից, ընտանիքում նաև տատիկ ունեն: Գյուղի մարդիկ են, ու հասկանալի է, թե ինչ սոցիալական պայմաններում են ապրում»,- ասաց գյուղապետը:

Նա տեղեկացրեց նաև, որ ծնողները որդու զոհվելու մասին լուրն իմացել են առավոտյան: «Տղայի մարմինն այսօր երեկոյան կտեղափոխեն գյուղ, իսկ հուղարկավորությունը ե՞րբ կլինի, դեռևս չեմ կարող ասել»,- եզրափակեց գյուղապետը: