Առանց տնտեսական առաջընթացի` չենք կարող երկրի անվտանգությունը լիարժեք երաշխավորել. Արծվիկ Մինասյան

Ոչ ոք հույս չունենա, թե սահմանային իրավիճակի սրումը կազդի մեր տնտեսության առաջընթացի վրա: Սպառնալիքներ, մարտահրավերներ կան` ներդրողների վրա ազդելու, սակայն մեր խնդիրն այդ սպառնալիքը չեզոքացնելն է: Այս մասին այսօր Նոր Հաճնում մի քանի լրագրողների հետ զրույցում ասաց ՀՀ էկոնոմիկայի նախարար Արծվիկ Մինասյանը՝ անդրադառնալով ապրիլյան մարտական գործողություններին և դրանց հետևանքներին:

Նախարարը նշեց, որ պետք է ջանքեր գործադրեն թե’ ներդրումներ ներգրավելու, թե’ Հայաստանի առևտրաշրջանառությունը պատշաճ մակարդակով ապահովելու ուղղությամբ: «Առանց տնտեսական առաջընթացի, առանց երկրում համախմբվածության` մենք չենք կարող երկրի անվտանգությունը լիարժեք երաշխավորել, հետևաբար` մեր համախմբվածության բանալին մեր տնտեսական նախաձեռնություններն առաջ մղելու մեջ է»,- ասաց նա՝ նշելով, որ հաղթահարելու ենք բոլոր մարտհրավերներն ու ապահովելու բյուջեով նախատեսված տնտեսական աճ:

«Խնդրում եմ ներքին տարաձայնությունները մի կողմ թողնել, համախմբվել մեր նախաձեռնությունների, ներդրողներ ներգրավելու, Հայաստանի տնտեսության առաջընթաց ապահովելու շուրջ»,- ասաց Մինասյանը՝ վստահեցնելով, որ ապահովելու են բյուջեով նախատեսված տնտեսական աճը, և որի նախադրյալները ներկայումս կան: