Коммерсантъ-ը մանրամասներ է ներկայացրել Մոսկվայում կրակի դադարեցման շուրջ ձեռք բերված պայմանավորվածության մասին

 Коммерсантъ-ը հոդված է հրապարակել ԼՂ հակամարտության գոտում սրված իրավիճակի մասին, որում որոշ մանրամասներ են հայտնի դառնում Մոսկվայում հրադադարի մասին ձեռք բերված պայմանավորվածության վերաբերյալ:

Այսպես՝ ՌԴ գլխավոր շտաբում աղբյուրը նշել է, որ ՌԴ-ն միանգամից հասկացել է, որ դա հերթական հրաձգությունը չէ, այլ լայնածավալ պատերազմի նախերգանք:

«Այդ իսկ պատճառով, երկրի ղեկավարությանն իրավիճակի զեկուցումից անմիջապես հետո մենք կապ հաստատեցինք ՀՀ-ի և Ադրբեջանի մեր գործընկերների հետ, որպեսզի համոզենք նրանց՝ վայր դնել զենքը և նստել բանակցային սեղանի շուրջ»,- ասել է նա:

Աղբյուրը նշել է, ՌԴ ՊՆ-ն աշխատում էր դադարեցնել բախումները, որոնք մեծ հաշվով հանգում էին ադրբեջանական ԶՈՒ-ի՝ ռազմավարական բարձունքներում ամրապնդվելու փորձերին (օրինակ՝ Թալիշի մոտակայքում):

«Հայ զինված ուժերը, իրենց հերթին, փորձում էին դա թույլ չտալ: Իսկ արդեն ապրիլի 5-ին Մոսկվայում ՀՀ և Ադրբեջանի գլխավոր շտաբի պետերի հանդիպմանը հաջողվեց համաձայնեցնել կրակի դադարեցման պայմանները»,- նշել է նա:

Աղբյուրը հավելել է, որ ՌԴ-ն անհրաժեշտության դեպքում պատրաստ է իր վրա վերցնել միջնորդի դերը և, եթե պետք լինի, կանչել իր մոտ ՀՀ-ի ու Ադրբեջանի նախագահներին: