Հակառակորդի կրակոցներից վիրավորված երեխային վիրահատել են

Տեղեկացրել էինք, որ հակառակորդի կրակոցների հետևանքով երկու երեխա է բուժում ստանում Ստեփանակերտի «Արևիկ» հիվանդանոցում:

Yerkir.am-ին հիվանդանոցից տեղեկացրին, որ 11-ամյա Վարդան Անդրեասյանին երեկ վիրահատել են`  տեղադրվել է արտաքին ֆիքսացիայի ապարատ:

«Վիրահատությունը հաջող է անցել, երեխան իրեն լավ է զգում, վիճակը ծանր կայուն է»,- ասացին հիվանդանոցից:

Նշենք, որ Վարդանը ստացել էր աջ ազդրոսկրի բազմաբեկորային վնասվածք:

Ինչ վերաբերում է մյուս տղային` 10-ամյա Գևորգ Գրիգորյանին, ապա նա ստացել էր աջ ազդրի փափուկ հյուսվածքների վնասվածք: Երեխայի վերքը երեկ ընդհանուր անզգայացմամբ վիրակապվել է: «Վերքը երկրորդային մշակման է ենթարկվել: Հիմա շարունակում ենք նրա բուժումը: Երեխայի մոտ առկա է դրական դինամիկա»,- հայտնեցին հիվանդանոցից: