Քրդերին մեղադրելու պատճառով Թուրքիայի մեջլիսում հերթական ծեծկռտուքն է տեղի ունեցել

Թուրքիայի մեջլիսում քրդերի մասին քննարկումների ընթացքում հերթական ծեծկռտուքն է տեղի ունեցել:

Ըստ Radikal-ի՝ իշխող «Արդարություն և զարգացում» կուսակցության խմբակցության փոխնախագահ Բյուլենթ Թուրքանը, վիրավորանք հնչեցնելով քրդամետ Ժողովուրդների դեմոկրատական կուսացության ղեկավար Սելահաթթին Դեմիրթաշի հասցեին, նրան մեղադրել է քրդերի դեմ գործողություններ իրականացնելու հրահանգներ տալու մեջ: Նրա խոսքով՝ քրդամետ ղեկավարն ինքն է հրահանգում սպանել քրդերին: 

«Քրդերին սպանեք» ասողները  քրդերի հետ խաղաղություն հաստատելու մասին ինչպե՞ս են խոսելու: Պղծեցիք խաղաղությունը»,- ասել է ԱԶԿ-ական պատգամավորը` փորձելով կոծկել իշխանությունների՝ քրդաբնակ տարածքներում իրականացվող գործողությունները:

ԺԴԿ-ական պատգամավորները հակադարձել են Թուրքանին, ինչից հետո մեջլիսում իրարանցում է սկսվել:

Կողմերին հանգստացնելու նպատակով մեջլիսի նախագահը ընդմիջում է հայտարարել: