ՀՀԿ-ն իշխանությունը հանձնում է ՀՅԴ-ին. Ազատ Արշակյան

Այսօր լրագրողների հետ հանդիպման ժամանակ ՀՀ Գերագույն Խորհրդի նախկին պատգամավոր Ազատ Արշակյանը և ԱԺ ՀՀԿ խմբակցության պատգամավոր Լեռնիկ Ալեքսանյանն անդրադարձան ՀՀԿ-ՀՅԴ քաղաքական համաձայնագրի կնքմանը: Ազատ Արշակյանի կարծիքով՝ դրանով էլիտայի մեջ փոփոխություն է տեղի ունենում, էլիտայի մի մասը հանձնվում է ՀՅԴ-ին:

«Տեսնում ենք որ փուլ առ փուլ իշխանափոխություն է տեղի ունենում: Հանրապետական կուսակցությունը աստիճանաբար ուզում է իշխանությունը հանձնել Դաշնակցությանը: Հանրապետականը արդեն լուծել է իր ծրագրերը, և քանի որ ասպարեզում այլ քաղաքական ուժեր չկան, ապա պահպանողական կուսակցությունը իր տեղը զիջում է սոցիալիստական ազգայնական ուժին»,-ասաց Ազատ Արշակյանը:

Լեռնիկ Ալեքսանյանի խոսքով՝ քաղաքական համաձայնության կնքումը հաջորդ սահմանադրական փոփոխությունների հանրաքվեին ենթադրում է լուրջ քաղաքական փոփոխություններ և լուրջ քաղաքական համագործակցություն: Ըստ պատգամավորի՝ այդ համագործակցությունը կտա իր դրական արդյունքները: Պատգամավորը շեշտեց, որ  համագործակցությունը ոչ թե գաղափարական միավորման մասին է, այլ ծրագրում ներառված մի շարք կետերի շուրջ համագործակցություն: Լեռնիկ Ալեքսանյանի խոսքով՝ քաղաքական համագործակցության կնքումը նշանակում է, որ իշխանությունը պատրաստվում է գնալ արմատական փոփոխությունների և նրան լրացուցիչ քաղաքական ռեսուրսներ են անհրաժեշտ: