ՔԲԿ-ի կողմնակիցները Ֆրանսիայում հարձակվել են թուրքական մզկիթի վրա

Ֆրանսիայի Մարինյան քաղաքում թուրքական մզկիթի առջև բախումներ են տեղի ունեցել Քուրդիստանի բանվորական կուսակցության (ՔԲԿ-PKK) կողմնակիցների և մզկիթի մոտակայքում գտնվող մարդկանց միջև. տեղեկացնում է Ermenihaber-ը:

Թուրքական Haberler լրատվակայքը, հղում անելով ֆրանսիական  France Bleu ռադիոկայանին, նշում է, որ քաղաքում  ցույց անող` ՔԲԿ-ի համակիրներից կազմված 60 հոգանուց խումբը պատրաստվել են մուտք գործել մզկիթ: Նրանք վանկարկել են Թուրքիայի կառավարության և նախագահ Ռեջեփ Թայիփ Էրդողանի դեմ կարգախոսներ: Բախման պատճառ է դարձել այն, որ մզկիթի մոտ գտնվող մարդիկ թույլ չեն տվել ցուցարարներին մտնել մզկիթ: Դեպքը տեղի է ունեցել ուրբաթօրյա նամազի ժամանակ:

Բախման ժամանակ  վիրավորվել է 6 հոգի: Նրանք ստացել են թեթև վնասվածքներ:

Ֆրանսիական ոստիկանությունը բախվող խմբերի դեմ կիրառել է արցունքաբեր գազ: Կան ձերբակալվածներ:

Նշենք, որ  ավելի վաղ Ֆրանսիայի Բորդո քաղաքում գտնվող Թուրքիայի դեսպանատան առջև ՔԲԿ-ի մի խումբ կողմնակիցներ բողոքի ակցիա էին կազմակերպել: