Օպերայի գլխավոր դիրիժորի հաստիքը կրճատվել է, քանի որ թատրոնն ունի գեղարվեստական ղեկավար. պաշտոնական

Տեղեկացրել էինք, որ Ալ. Սպենդիարյանի անվան օպերայի և բալետի ազգային ակադեմիական թատրոնում տեղի են ունեցել կառուցվածքային փոփոխություններ:

Թատրոնի տեղեկատվության և հասարակայնության հետ կապերի բաժինը պարզաբանում է ներկայացրել` կատարված փոփոխությունների հետ կապված: Ըստ այդմ` այդ փոփոխությունները միտված են բացառապես ստեղծագործական որակի բարձրացմանը: Փոփոխությունների առաջարկն արվել է թատրոնի գեղարվեստական ղեկավար Հայաստանի և Լիտվայի ժողովրդական արտիստ Գեղամ  Գրիգորյանի կողմից, որը արժանացել  է թատրոնի ղեկավարության հավանությանը:

Կատարված կառուցվածքային փոփոխությունների արդյունքում կրճատվել է թատրոնի գլխավոր դիրիժորի և երաժշտական ղեկավարի հաստիքը, քանի որ թատրոնն արդեն ունի գեղարվեստական ղեկավար:  Սպենդիարյանի անվան օպերայի և բալետի ազգային ակադեմիական թատրոնում գլխավոր դիրիժորի հաստիք այլևս չի լինելու:

Թատրոնն այսօր ունի երեք դիրիժոր՝ Աթանես Առաքելյան, Հարություն Արզումանյան, Ռուբեն Ասատրյան: Իտալացի նշանավոր դիրիժոր Ջանլուկա Մարչանոն թատրոնի հետ կշարունակի իր համագործակցությունը` հրավիրյալ դիրիժորի կարգավիճակով: Առաջիկայում նախատեսված է նաև այլ հրավիրյալ դիրիժորների հետ համագործակցություն նույնպես:

ՀՀ վաստակավոր արտիստ Կարեն Դուրգարյանին առաջարկվել է շարունակել աշխատել` որպես թատրոնի դիրիժոր, սակայն նա հրաժարվել է: