Ծանր տեխնիկայի օգտագործումն անթույլատրելի է. ԱՄՆ պետդեպը՝ սահմանին լարվածության և նախագահների հանդիպման մասին

ԱՄՆ պետքարտուղարության մամուլի ծառայության ղեկավար Ջոն Քիրբին հերթական ճեպազրույցի ընթացքում անդրադարձել է ղարաբաղա-ադրբեջանական սահմանին տեղի ունեցած վերջին միջադեպերին։

Քիրբին ցավակցել է վերջին միջադեպի հետևանքով զոհվածների կամ վիրավորվածների ընտանիքներին՝ հիշեցնելով, որ նման հարձակումները չեն համապատասխանում ԼՂ հակամարտությունը խաղաղ ճանապարհով լուծելու` Ադրբեջանի ու Հայաստանի նախագահների ստանձնած հանձնառություններին։

«Ադրբեջանական և հայկական զորքերի շփման գծում վերջին սրացումն ու ծանր տեխնիկայի օգտագործումն անթույլատրելի է»,- ասել է նա՝ կոչ անելով կողմերին՝ պահպանել  հրադադարի ռեժիմը:

Հայաստանի և Ադրբեջանի նախագահների առաջիկա հանդիպման մասին լրագրողի հարցին ի պատասխան՝ Քիրբին հայտնել է, որ ԵԱՀԿ Մինսկի խմբի համանախագահներն այս ամիս կհանդիպեն հակամարտության կողմերի նախագահների հետ։

«Մենք կողմերին կոչ ենք անում բռնությունից խուսափելու և բանակցությունների մթնոլորտը բարելավելու համար միջոցներ ձեռնարկել»,- ասել է նա։