Սահմանադրական բարեփոխումներն անցնցում իշխանափոխություն են ապահովում

ԱԺ ՀՀԿ խմբակցության անդամ, ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը չի կիսում սահմանադրական բարեփոխումների վերաբերյալ` Ռոբերտ Քոչարյանի տեսակետը: Այսօր` լրագրողների հետ հանդիպման ժամանակ, նա կարծիք հայտեց, որ եթե գործող Սահմանադրությամբ իշխանությունը չափազանց մեծ հնարավորություն է ունենում վերարտադրվելու, ապա սահմանադրական բարեփոխումների հետևանքով անցնցում իշխանափոխությունն է ապահովվելու:

«Համաձայն չեմ կարծիքին, թե առաջարկվող նախագիծը երկիրը տանում է կուսակցապետության: Գործող Սահմանադրության խնդիրներից մեկն այն է, որ օրենքով առաջնային երկու մանդատ գոյություն ունի, որոնցից երկուսն էլ այսօր նույն կուսակցությանն են պատկանում, և սա, մյուս կողմից, լավ է, քանի որ կանխում էր մի շարք ներքին ցնցումներ: Մենք, ճիշտ է, մի քիչ վատ տարբերակով ենք առաջ գնացել, որը կանխում է զարգացումը, և այս ձևով իշխանության գերկենտրոնացում ենք ունենում»,- ասաց Մինասյանը:

Նա նշեց նաև, որ առաջարկվող Սահմանադրությունը մեխանիզմների առկայության տեսանկյունից շատ ավելի հավասարակշռված է, քան գործող Սահմանադրությունը: