Կարմիր խաչը պատրաստ է կազմակերպել Ադրբեջանում հայտնված կոթեցի կնոջ վերադարձը

Երեկ Կարմիր խաչի միջազգային գրասենյակի՝ Բաքվի ներկայացուցիչներն առաջին անգամ այցելել են նոյեմբերի 8-ին Ադրբեջանում հայտնված՝ Տավուշի մարզի Կոթի գյուղի 76-ամյա բնակչուհի Լուսիկ Աբովյանին: Այս տեղեկությունն Yerkir.am-ի հետ զրույցում հաստատեց ԿԽՄԿ հայաստանյան գրասենյակի մամուլի պատասխանատու Զառա Ամատունին:

Կարմիր խաչի ներկայացուցիչները ծանոթացել են Լուսիկ Աբովյանի կացարանի պայմաններին, պատրաստակամություն հայտնել, կողմերի համաձայնության դեպքում, կազմակերպել քաղաքացու հայրենադարձությունը: Իսկ այն տեղեկությունը՝ արդյո՞ք սահմանն անցած կնոջը հնարավորություն կտրվի կապ հաստատել հարազատների հետ, գաղտնի է:

Հիշեցնենք, որ Լուսիկ Աբովյանը սկզբում համարվում էր անհայտ կորած, իսկ հետո հայտնի դարձավ, որ նա Ադրբեջանում է: