Էրդողանամետ հայ պատգամավորը զավեշտալի հայտարարություններով գովերգել է Թուրքիան

Թուրքիայում իշխող «Արդարություն և զարգացում» կուսակցությունից հայ պատգամավոր Մարգար Եսայանը, ով աչքի է ընկնում իր էրդողանամետ գաղափարներով, զավեշտալի հայտարարություններով է հանդես եկել:

Ըստ T24-ի՝ Sputnik լրատվական գործակալության հետ զրույցում Եսայանն անդրադարձել է ընտրությունների արդյունքներին և  քրդական հարցի կարգավորմանը: Նրա խոսքով՝ ընտրությունների արդյունքները ցույց տվեցին, որ Քրդական բանվորական կուսակցության դեմ պայքարը պետք է շարունակվի։

Եսայանը նշել է, որ թուրքական իշխանությունները քրդական հարցի կարգավորման համար այսուհետ չեն երկխոսելու քրդամետ Ժողովուրդների դեմոկրատական կուսակցության հետ և հաշվի չեն առնելու ՔԲԿ-ի ղեկավար Օջալանին: «Փոխարենը՝ իշխանությունները երկխոսելու են միայն քուրդ ժողովրդի հետ»,- ասել է նա:

Թուրքիայում մամուլի ազատությանն անդրադառնալով՝ Եսայանն այնպիսի հայտարարություն է արել, որն իսկապես ծիծաղ կարող է առաջացնել Թուրքիայում ԶԼՄ-ների և լրագրողների դեմ բռնության մասին քաջատեղյակ մարդկանց շրջանում: «Թուրքիայում մամուլն այնքան ազատ է, որ գուցե Եվրոպայում այդքան ազատ չէ»,- ասել է նա: