«Կարող է` Արմենչիկը մի էլիտար շրջապատում երգել է, որոշել են լավություն անել»

Երգահան Արտավազդ Բայաթյանն այսօր լրագրողների հետ  զրույցում խոսեց Արմենչիկին վաստակավոր արտիստի կոչում շնորհելու մասին և անդրադարձավ կոչումների ինստիտուտին` առհասարակ: Ըստ նրա`այսօր այդ ինստիտուտը վարկաբեկվել է: Երգահանը խորհուրդ տվեց հետևել աշխարհի շատ երկրների օրինակին և հրաժարվել կոչումներից:

«Վաստակավորի կոչում տալիս են հայրենիքին մատուցած ծառայությունների համար: Աշխարհի շատ երկրներում մարդկանց պարգևատրում են, կոչումներ չեն տալիս: Կոչումների հանձնումը եկել է խորհրդային հասարակարգից: Բայց այն ժամանակ, օրինակ, Փարաջանովին կոչում չէին տա, քանի որ նա չէր ծառայում այդ վարչակարգին»,- ասաց Բայաթյանը:

Նրա կարծիքով` երգիչ Արմենչիկին վաստակավոր արտիստի կոչում են տվել, հավանաբար, նրան լավություն անելու նպատակով: «Կարող է` Արմենչիկը մի տեղ՝ էլիտար շրջապատում, քեֆ-ուրախության ժամանակ երգել է, որոշել են լավություն անել: Նրան խոստացել են մի բանով լավության տակից դուրս գալ և տեղը տվել են այդ կոչումը: Կան մարդիկ, ովքեր Արմենչիկին նման կերպ են շնորհակալություն հայտնում»,- նշեց երգահանը: