Կառավարությունը մերժեց վարորդների տուգանքներում տարբերակում սահմանող` Փաշինյանի օրինագիծը

Կառավարության այսօրվա նիստում արդարադատության նորանշանակ նախարար Արփինե Հովհաննիսյանը գործադիրին ներկայացրեց ԱԺ «Հայ ազգային կոնգրես» խմբակցության պատգամավոր Նիկոլ Փաշինյանի հեղինակած` «Տեսանկարահանող կամ լուսանկարահանող սարքերով հայտնաբերված` ճանապարհային երթևեկության կանոնների խախտումների վերաբերյալ գործերով իրականացվող վարչական վարույթի առանձնահատկությունների մասին» ՀՀ օրենքում լրացումներ կատարելու օրենսդրական նախաձեռնության վերաբերյալ կառավարության եզրակացությունը:

Պատգամավոր Նիկոլ Փաշինյանն առաջարկում է ճանապարհային երթևեկության կանոնների խախտման համար տուգանքներ նշանակելիս որոշակի տարբերակում մտցնել, մասնավորապես` սոցիալապես պակաս ապահովված վարորդների տուգանքի չափերը նվազեցնել 50 տոկոսով` թեթևացնելով երթևեկությանը հետևող տեսանկարահանող և լուսանկարահանող սարքերի գործունեության արդյունքում ՀՀ քաղաքացիների ուսերին ծանրացող ֆինանսական բեռը:

Արփինե Հովհաննիսյանը շեշտեց, որ գործադիրը ևս կիսում է ՀԱԿ պատգամավորի մտահոգությունը, սակայն այն չափորոշիչները, որոնք դրված են առաջարկվող փոփոխության հիմքում, չեն կարող օբյեկտիվորեն ներկայացնել վարորդների իրական սոցիալական վիճակը։

Այսպիսով` կառավարությունը բացասական եզրակացություն տվեց պատգամավորի կողմից ներկայացված օրենսդրական նախագծին։