Ես լուրջ չեմ ընդունում այդ գիրքը. Դավութօղլուն՝ Գյուլի մասին գրքի վերաբերյալ

Թուրքիայի վարչապետ Ահմեդ Դավութօղլուն հայտնել է, որ լուրջ չի ընդունում նախկին նախագահ Աբդուլլահ Գյուլի մասին գրված գիրքը. տեղեկացնում է Odatv-ն:

Գյուլի խորհրդականի գրած և երկուշաբթի օրը հանրությանը ներկայացված գիրքը մեծ աղմուկ էր բարձրացրել հատկապես այն բանի համար, որ գրքում ներկայացվել էր Գյուլի՝ 2008 թվականի այցը Հայաստան: Հեղինակը նշել էր, Գյուլը Հայաստան էր ժամանել Էրդողանի, Դավութօղլուի և մի շարք զինվորականների կամքին հակառակ:

Պնդելով, որ գիրքը «միակողմանի» է` Դավութօղլուն ասել է. «Իրադարձությունները պետք չէ նկարագրել ընտրված և միակողմանի տեսակետով: Ես այս գրվածքը լուրջ չեմ ընդունում, այն չի արտացոլում ճշմարտությունը: Հարկ չկա անգամ խոսել դրա հրապարակման ժամանակի մասին»:

Նշենք, որ թեև Գյուլի մասին գիրքը պատրաստ էր դեռ խորհրդարանական ընտրություններից շատ առաջ, սակայն նա չէր թույլատրել հրապարակել այն ընտրություններից առաջ: