ԵՄ-ն մինչ 2019 թվականը գազ կստանա Թուրքմենստանից

Եվրամիությունը հույս ունի մինչ 2019 թվականը սկսել  գազ ներկրել Թուրքմենստանից: Այդ մասին հայտարարել է Եվրահանձնաժողովի փոխնախագահ Մարոշ Շևչովիչը. հայտնում է  Зеркало недели-ն:

«Մենք լավ փոխըմբռնում ունենք: Թուրքմենստանի համար կարևոր է դիվերսիֆիկացնել արտահանման հնարավորությունները, մինչդեռ ԵՄ-ի համար շատ կարևոր է դիվերսիֆիկացնել ներկրումը»,- ասել է Շևչովիչը:

Նա նշել է, որ նախագիծը, որը ենթադրում է թուրքմենական գազի մատակարարում Կասպից ծովի միջոցով, այսպես կոչված` «Հարավային միջանցքը», որը ներառում է Ադրբեջանն ու Թուրքիան, տարիներ շարունակ դոփում է տեղում քաղաքական, ֆինանսական անորոշությունների պատճառով: «Սակայն այժմ կա քաղաքական որոշում՝ Թուրքմենստանը կդառնա նախագծի մաս և կմատակակարի եվրոպական ուղղությունը»,- նշել է Շևչովիչը:

Նշենք, որ այդ կերպ ԵՄ-ն աշխատում է նվազեցնել ռուսական էներգակիրների մատակարարումներից կախվածությունը, քանի որ Ռուսաստանի հետ հարաբերությունները ուկրաինական ճգնաժամի պատճառով լարված են: